Iha loron Sabadu, 10 Janeiru 2026, Governu ofisializa Eskema Irigasaun Galata, ne’ebé hodi fornese be’e ba natar sira iha área Venilale. Serimónia ofisializasaun ida ne’e lidera husi Sua Exelénsia Primeiru-Ministru RDTL, Kay Rala Xanana Gusmão, akompaña husi Exelénsia Prezidente Autoridade Munisípiu Baucau, Dra. Veneranda E. M. Lemos Martins, ho membru Governu sira seluk.
Eskema Irigasaun Galata lokaliza iha Suku Uatu-Haco, Postu Administrativu Venilale, Munisípiu Baucau, no sei fó kontribuisaun boot ba dezenvolvimentu setór agrikultura iha rejiaun leste Timor-Leste.
Liuhusi polítika IX Governu Konstituisionál, Ministériu Agrikultura, Pekuária, Peska no Floresta (MAPPF) kontinua implementa programa modernizasaun agrikultura liuhusi dezenvolvimentu eskema irigasaun hodi fornese be’e ba natar, atu fasilita agrikultór sira hasa’e produsaun agríkola, liu-liu iha Postu Administrativu Venilale, Munisípiu Baucau.
Eskema Irigasaun Galata sei kobre área natar 720 hektares, inklui mos área Waibobo, iha Postu Administrativu Ossú, Munisípiu Viqueque.
Iha nia intervensaun, Exelénsia Prezidente Autoridade Munisípiu Baucau, Dra. Veneranda E. M. Lemos Martins, agradese ba IX Governu Konstituisionál, liuhusi MAPPF, tanba fó ona be’e ba natar sira ne’ebé sei tulun komunidade agrikultór sira halai natar no hasa’e produsaun ai-han iha Munisípiu Baucau.
“Oinsá mak ami bele hatete katak atu hapara ka hamenus importasaun foos, sé ami laiha be’e no estrada ne’ebé di’ak,” hateten husi PAM Baucau.
Exelénsia mós apela ba Governu Sentral atu haree ho atensaun liu tan ba kestaun infraestrutura bázika, liu-liu estrada, hodi nune’e komunidade bele lori produtu lokál ho fasilidade ba merkadu.
“Ami presiza fó hanoin fila-fali katak Baucau ema badinas maibé nafatin ami dehan katak ami tenki kontinua nafatin reprezenta Governu Sentral hodi hakbi’it servisu governu nian mai munisípiu, to’o postu, suku no aldeia sira. Maibé problema boot ida mak estrada,” hateten husi Exelénsia PAM Baucau iha nia intervensaun.