Laivai, Sexta-feira, 9 Janeiru 2026
Nonu Governu Konstituisionál, ne’ebé lideradu husi Sua Exelénsia Primeiru Ministru RDTL, Kay Rala Xanana Gusmão, ohin hamutuk ho Ministru Agrikultura, Peskas, Pekuária no Floresta no Ministru Planeamentu no Investimentu Estratéjiku, membru Governu, membru Parlamentu Nasionál, Xefe Estadu Maiór Jenerál Forsa Defesa Timor-Leste (F-FDTL), Tenente Jenerál no Tenente Jenerál Reformadu, ofisiálmente hala’o serimónia inaugurasaun Esquema Irigasaun Laivai, ne’ebé lokaliza iha Bairo Taleta, Suku Ililai, Postu Administrativu Lautém, Munisípiu Lautém.
Projetu konstrusaun Esquema Irigasaun Laivai ne’e implementadu husi Konsultan Jenetbi Gumer, Lda (JV) ho parceiru PT Wahana ADYA Indonézia no Kontratór CICO – Xina, ho total orsamentu USD 9,361,964.36.
Iha nia intervensaun, Sua Exelénsia Prezidente Autoridade Munisipál Lautém, Sr. Mélio de Jesus, SH, hodi naran Povu Munisípiu Lautém, hato’o agradesementu ba Nonu Governu Konstituisionál ne’ebé lideradu husi Primeiru Ministru Kay Rala Xanana Gusmão, liuliu ba Ministru Agrikultura, Peskas, Pekuária no Floresta no Ministru Planeamentu no Investimentu Estratéjiku, tanba fó prioridade ba konstrusaun Esquema Irigasaun Laivai iha Suku Ililai.
Prezidente Autoridade Munisipál Lautém hateten katak Esquema Irigasaun Laivai sei fornese bee ba natar ho área besik 500 hektare, ne’ebé durante tinan barak abandona tanba la iha sistema irrigasaun. Nia mós hateten katak atualmente iha 61 sistema irrigasaun tradisionál ne’ebé komunidade sira uza de’it iha tempu udan, no agora Governu halo ona investimentu ba irigasaun modernu rua, hanesan Irigasaun Laivai no Irigasaun Irabere, ne’ebé sei fó impaktu boot ba hasa’e produsaun agríkola.
Lider máximu Munisípiu Lautém enkoraja Autoridade Postu Administrativu, Suku no Aldeia atu kontinua motiva komunidade sira hodi tama natar, kuda hare no hasa’e produsaun alimentar iha Munisípiu Lautém. Nia mós husu komunidade Suku Ililai atu ko’alia no tau matan ba manutensaun sistema irrigasaun no ninia ekipamentu, hodi bele uza iha tempu naruk.
Iha okazia hanesan, Sua Exelénsia Primeiru Ministru Kay Rala Xanana Gusmão husu ba Autoridade Postu Administrativu, Suku no Aldeia katak Esquema Irigasaun Laivai agora tama ona iha responsabilidade tomak komunidade nian. Primeiru Ministru apela ba povu atu aproveita bee irrigasaun ne’e hodi kuda hare no hasa’e produsaun alimentar iha aldeia no suku sira.
Durante serimónia inaugurasaun, Ministru Agrikultura, Peskas, Pekuária no Floresta mós entrega ekipamentu mekanizasaun agríkola hanesan:
-
Trator Kubota Mediu L5018 Unidade 2
-
Rotary Unidade 2
-
Tasu Karau Unidade 1
-
Makina Kuda Hare Unidade 1
-
Rak/Bandeja Viveirus kapasidade 600 pés
-
Makina Kua Hare Unidade 2
Ekipamentu sira ne’e sei fasilita grupu agrikultura sira atu aumenta efisiénsia servisu no hasa’e produsaun aihan.
Hafoin remata serimónia inaugurasaun Esquema Irigasaun Laivai, Sua Exelénsia Primeiru Ministru akompaña husi Ministru Defesa, Xefe Estadu Maiór Jenerál F-FDTL Tenente Jenerál Domingos Raúl Falur Rate Laek, no Tenente Jenerál Reformadu Lere Anan Timur (LAT), halo lansamentu fila natar iha área Irigasaun Laivai.
Remata.