Dili, 06 Agostu 2025 – Ministériu Asuntu Kombatentes Libertasaun Nasionál (MAKLN), liideradu husi Ministru Gil da Costa Monteiro “Oan-Soru”, apresente proposta planeamentu no alokasaun orsamentu ba tinan 2026 iha reuniaun Komité Revizaun Orsamental, ne’ebé lidera diretamente husi Primeiru-Ministru Maun Boot Kay Rala Xanana Gusmão.
S.E. Eng. Gastão Francisco de Sousa, Ministru Planeamentu no Investimentu Estratéjiku (MPIE), mós partisipa iha reuniaun importante ida ne’e, ho objetivu atu haree no akompanha prosesu prezentasaun proposta husi ministeriu sira tuir orientasaun tetu fiskál no prioriadade governu.
💰 Proposta Orsamentu MAKLN: $201 Milhaun
Ministru Oan-Soru hateten katak MAKLN nia proposta tuir rigorozamente tetu fiskál, no totaliza USD 201 milhaun, hodi sustenta programa sira prioritáriu:
-
Pagamentu pensaun ba veteranu sira, ne’ebé sei fó dalan ba diskusaun no polémika publiko.
-
Konstrusaun Jardim ba Erói sira iha nivel nasional, iha fatin balun obra la’o hela.
-
Hakoi restu mortál sira iha Timor, ho estimativa total restu iha 12.000. Dezde IV Governu to’o IX Governu, foin mak hakoi mate-ruin 2.000.
Ministru sublinha:
“Ami-nia orsamentu mós aloka ba programa konstrusaun sira atu bele konklui iha tinan oin.”
📉 Desempenhu Ezekusaun OJE 2025
MAKLN hetan persentajen ezekusaun ki’ik liu (27%) iha OJE 2025, tanba seidauk halo pagamentu ba veteranus, liu-liu sira ne’ebé iha reklamasaun no konstentasaun legal.
Ministru hateten:
“Iha fulan Dezembru tinan ne’e, ami sei komesa halo pagamentu balun, no persentajen ezekusaun sei sa’e.”