16 Jullu 2025 – Ministériu Planeamentu no Investimentu Estratéjiku (MPIE), liuhusi Unidade Planeamentu Integradu (UPI), realiza enkontru tékniku ho ekipa husi Ministériu Planeamentu no Dezenvolvimentu Nasionál/Ajénsia Planeamentu no Dezenvolvimentu Nasionál (PPN/BAPPENAS) Indonézia iha Jakarta, ho objetivu atu estabelese Komite Konjunta hodi implementa kompromisu sira ne’ebé estipula iha Memorandu Entendimentu (MoU) ne’ebé asina iha Outubru 2024.
Delegasaun Timor-Leste lidera husi Sra. Epi Orleães, Koordenadora UPI/MPIE, ho partisipasaun husi Gabinete Primeiru Ministru (GPM), Ministériu Finansas, no Ajénsia Dezenvolvimentu Nasionál (ADN,.I.P). vizita ida ne’e halo reafirmasaun kona-ba importánsia ba estabelesimentu Komite Konjunta, tuir Artigu 6 MoU, hodi fasilita koordenasaun entre institusaun relevantes, no assegura implementasaun efetiva ba programa kooperasaun.
Iha oportunidade ne’e, Sra. Epi hato’o agradesimentu ba komitmentu sira husi PPN/BAPPENAS atu kontinua halo kolaborasaun ne’ebé konsistente no konstrutivu ho Timor-Leste. Nia sublinha tan katak, kooperasaun ida ne’e importante tebes atu sustenta planeamentu dezenvolvimentu médium no longo prazu, no bele fahe esperiénsia kona-ba boas práticas entre nasaun rua.
Enkontru ne’e konsidera nudar pasu importante ba implementasaun MoU mak asina ona hosi Timor-Leste no Indonésia iha 2024 no hametin liutan kooperasaun bilateral entre país rua.
Remata.