Iha Quarta Feira loron 9 fulan-Jullu tinan 2025.
S.E Ministru Planeamentu no Investimentu Estratejìkù. Eng Gastão Francisco de Sousa Partisipa Sorumutu Konsellu Ministrus nian.
Konsellu Ministrus hala’o sorumutu iha Palásiu Governu, Dili, no aprova projetu Dekretu-Lei, ne’ebé aprezenta hosi Ministru Ensinu Superiór, Siénsia no Kultura, José Honório da Costa Pereira Jerónimo, ba Kriasaun Institutu Politékniku Timor-Leste.
Institutu Politékniku Timor-Leste, ne’ebé habadak ho naran IPTL, hodi troka atuál Institutu Politékniku Betanu, hodi fó karater nasionál ba estabelesimentu ensinu superiór foun ne’e. Órgauns ein-ezersísiu, rekursus umanus dosentes no la dosentes no patrimóniu Institutu Politékniku Betanu nian nafatin la altera, atu nune’e bele garante kontinuidade institusionál no funsionamentu eskola superiór sira ne’ebé funsiona dezde tinan 2017, sein prejuizu ba kriasaun unidades orgánikas foun.
IPTL sei iha sede iha Betanu, no ninia jestaun administrativa no akadémika bele inklui eskolas superiores iha munisípiu sira seluk. Kondisaun adekuadu sira iha ona hodi garante dezlokasaun hosi órgaun kompetente sira, hodi asegura jestaun ida ne’ebé efisiente ba ensinu superiór tékniku.
Diploma ne’e mós determina katak Institutu foun ne’e mantein akreditasaun institusionál ba tinan lima ne’ebé fó husi Ajénsia Nasionál ba Avaliasaun no Akreditasaun Akadémika, I.P. (ANAAA) ba Institutu Politékniku Betanu, tuir termu Diploma Ministeriál n. 11/2023, loron 19 fulan-abríl, lahó nesesidade atu adota rejime instalasaun ka períodu tranzitóriu ida.
Konsellu Ministrus delibera atu halo reestruturasaun ida ba administrasaun indireta Estadu nian, ho objetivu atu hasa’e efisiénsia no transparénsia jestaun públika nian, hamenus redundánsia institusionál no hadi’a artikulasaun entre polítika públika sira no nia ezekusaun.
Deliberasaun ne’e estabelese prinsípiu orientadór sira ba reorganizasaun ida ne’ebé abranjente hosi entidade públika sira ho autonomia administrativa no finanseira, ho objetivu atu garante espesializasaun téknika ne’ebé boot-liu, rasionalizasaun rekursus no hadi’a kualidade servisu ne’ebé presta ba sidadaun sira. Prevee uniaun hosi entidade sira ne’ebé ho funsaun ne’ebé besik atu hanesan, inkorporasaun hosi instituisaun balu iha estrutura hosi ministériu setoriál sira, no mós transformasaun institutu públiku balun ne’ebé iha servisu administrasaun direta Estadu nian. Reforma ne’e, sei inklui mós reestruturasaun no estinsaun ba entidade administrasaun indireta balun, ho sira-nia kompeténsia sei transfere ba sira-nia liña ministeriál sira.
Konteúdu espesífiku hosi reestruturasaun ne’e sei regula hosi diplomas governu nian lubuk ida, ne’ebé sei elabora no submete ba konsiderasaun no aprovasaun hosi Konsellu Ministru tuir nia tempu.
#Midia MPIE