𝐒𝐨𝐫𝐮𝐦𝐮𝐭𝐮𝐤 𝐊𝐨𝐧𝐬𝐞𝐥𝐥𝐮 𝐌𝐢𝐧𝐢𝐬𝐭𝐫𝐮𝐬 𝐧𝐢𝐚𝐧 𝐢𝐡𝐚 𝐥𝐨𝐫𝐨𝐧 𝟏 𝐟𝐮𝐥𝐚𝐧-𝐟𝐞𝐯𝐞𝐫𝐞𝐢𝐫𝐮 𝐭𝐢𝐧𝐚𝐧 𝟐𝟎𝟐𝟑

𝐒𝐨𝐫𝐮𝐦𝐮𝐭𝐮𝐤 𝐊𝐨𝐧𝐬𝐞𝐥𝐥𝐮 𝐌𝐢𝐧𝐢𝐬𝐭𝐫𝐮𝐬 𝐧𝐢𝐚𝐧 𝐢𝐡𝐚 𝐥𝐨𝐫𝐨𝐧 𝟏 𝐟𝐮𝐥𝐚𝐧-𝐟𝐞𝐯𝐞𝐫𝐞𝐢𝐫𝐮 𝐭𝐢𝐧𝐚𝐧 𝟐𝟎𝟐𝟑

Konsellu Ministrus hala’o sorumutuk iha Palásiu Governu, iha Dili, no aprova ona Projetu Proposta Lei, ne’ebé aprezenta husi Vise-Primeiru-Ministru no Ministru Planu Ordenamentu, José Maria dos Reis, kona-ba Medida Tutela Legalidade Urbanístika.

Ho aprovasaun, iha tinan kotuk, rejime jurídiku ba edifikasaun no urbanizasaun, ne’ebé mai atu regula lisensiamentu ba konstrusaun no utilizasaun edifikasaun nian, presiza atribui ba Governu ferramenta legál sira ne’ebé adekuada ne’ebé permite atu garante aplikasaun husi rejime ne’e.

Nune’e, projetu Proposta Lei ida-ne’e ho objetivu atu estabelese medida tutela legalidade urbanístika, hodi regula atu administrativu sira ne’ebé presiza hodi garante kumprimentu lejizlasaun kona-ba lisensiamentu operasaun urbanístika, ba edifikasaun, nune’e mós ba kumprimentu instrumentu jestaun teritoriál nian.

Ho proposta ida-ne’e, sei estabelese medida lima kona-ba responsabilidade hosi legalidade urbanístika – embargu (hapara), sobu obra nian, despeju (hasai husi fatin), liuhusi asaun administrativa, hapara utilizasaun no prosedimentu legalizasaun nian – ne’ebé sei permite Governu atu halo asaun no estabelese legalidade urbanístika filafali, hodi konsidera grau gravidade nian kona-ba ilísitu urbanístiku no posibilidade atu legaliza obra nian.

…

Aprezenta mós husi Vise-Primeiru-Ministru, aprova ona projetu Rezolusaun Governu ba alterasaun dahuluk ba Rezolusaun Governu nian n. 15/2022, loron 6 fulan-abril, kona-ba Determinasaun elaborasaun Planu Urbanizasaun Sidade Dili nian.

Ho alterasaun ida-ne’e, sei prevee katak, ba oin, Ministru Planu Ordenamentu bele aumenta prazu hodi elabora Planu Urbanizasaun Sidade Dili nian, ho fundamentasaun, liu fulan 10 ne’ebé molok estabelese ona.

Aleinde ne’e, sei estabelese mós katak, tanba urjénsia, diskusaun públika ba Planu Urbanu ninia períodu maka loron 30.

…

Aprova ona projetu Dekretu-Lei, ne’ebé aprezenta husi Primeiru-Ministru, Taur Matan Ruak, ba alterasaun dahuluk ba Dekretu-Lei n. 3/2009, loron 15 fulan-janeiru, kona-ba Servisu Nasionál Intelijénsia nian (SNI).

Ho projetu Dekretu-Lei ne’e hakarak atu hasae kapasitasaun institusionál SNI nian, liuhusi reorganizasaun ninia estrutura no korrespondente sira kompeténsia, no adapta lais liu no konsentáneu ho dezafiu no ezijénsia daudaun ne’e nian.

Hakarak mós atu klarifika norma sira ne’ebé relasiona ho estrutura organizasionál no posibilita, ho ninia diploma rasik katak pesoál SNI iha estatutu rasik no ho karreira espesiál, hodi haree ba ninia kualifikasaun di’ak, nune’e insentiva nia ba kualifikasaun di’ak, prestasaun di’ak hodi kumpre ninia misaun.

…

Konsellu Ministrus aprova projetu Dekretu-Lei rua, ne’ebé aprezenta husi Ministru Transportes no Komunikasoins, José Agustinho da Silva, kona-ba transporte aéreu internasionál regulár no la regulár.

Objetivu husi diploma sira ne’e atu regulamenta aprovasaun sira hodi asesu ba merkadu voo regulár no la regulár, ho forma atu garante seguransa ba sidadaun sira no atu promove organizasaun husi matéria ida ne’e haree ba regulamentasaun internasionál ne’e rasik.

Diploma hirak ne define rekizitu, regulamentu, kondisaun no restrisaun lubuk ida ba autorizasaun no atividade transporte aéreu internasionál regulár no la regulár.

…

Konsellu Ministrus aprova kalendáriu operasaun ba resenseamentu eleitorál iha rai-li’ur, ne’ebé aprezenta husi Ministru Administrasaun Estatál, Miguel Pereira de Carvalho.

Nune’e, formasaun ba membru sira Komisaun Resenseamentu Eleitorál sei hala’o iha loron 22 to’o 23 fulan-fevereiru tinan 2023, inskrisaun ba resenseamentu eleitorál sei hala’o entre loron 24 fulan-fevereiru to’o loron 24 fulan-marsu tinan 2023. Elaborasaun , extrasaun no remesa ba lista eleitór sira, liuhusi via eletrónika, husi misaun diplomátika sira no postu konsulár ida-idak sei hala’o iha loron 25 to’o 26 fulan-marsu. Períodu espozisaun no reklamasaun ba lista eleitór sira ne’ebé hela iha rai-li’ur ne’e define ba períodu husi loron 27 to’o loron 31 fulan-marsu no sinkronizasaun sistema resenseamentu eleitorál sei hala’o entre loron 1 to’o loron 11 fulan-abril. Ikusliu, númeru sira ne’ebé inskritu iha resenseamentu eleitorál tenke publika to’o loron 12 fulan-abril tinan 2023.

…

Konsellu- Ministrus, tuir projetu ne’ebé aprezenta husi Ministru Finansas, Rui Augusto Gomes, haree ba rekomendasaun sira husi Kámara Kontas, delibera ona atu ensera konta bankária aberta iha tinan 2018, hamutuk ho Banku Sentrál Timor-Leste, titulada husi Autoridade Nasionál Petróleu no Minerais, relasiona ho projetu TL Cement, no transferénsia husi montante ne’ebé depozita iha konta ne’e ba iha konta Tezouru nian.

…

Konsellu Ministrus aprova ona projetu Rezolusaun Governu, ne’ebé aprezenta husi Vise-Ministru Negósius Estrajeirus no Kooperasaun, Julião da Silva, hodi halo suspensaun ba desizaun kandidatura Timor-Leste nian ba Konsellu Direitus Umanus Organizasaun Nasoins Unidas, ba períodu tinan 2024 -2026, adota liuhusi Rezolusaun Governu nian n. 61/2021, loron 12 fulan-maiu. Nune’e, Timor-Leste aliña ninia pozisaun ho desizaun ASEAN nian, ne’ebé hili Repúblika Indonézia nu’udar kandidatu úniku ba organizasaun Konsellu Direitus Umanus ba períodu tinan 2024-2026, suspende ninia kandidatura to’o eleisaun Konsellu Direitus Umanus ba períodu tinan 2027-2029.

…

Ikusliu, aprova ona projetu Dekretu-Lei, ne’ebé aprezenta husi Vise Ministra Solidariedade Sosiál, Signi Chandrawati Verdiál, ba alterasaun daruak ba Dekretu-Lei n.37/2022, loron 25 fulan-maiu kona-ba subsídiu fim do ano ba uma kain sira.

Hodi bele garante pagamentu subsídiu refere ba reklamante sira ne’ebé sira-nia reklamasaun aprezenta ona no aseita husi Komisaun Pagamentu, projetu Dekretu Lei ne’e hakarak alarga períodu pagamentu to’o fulan-abril tinan 2023.

Hanaruk mós, to’o loron 30 fulan-juñu tinan 2023, prazu atu entrega ba Konsellu Ministrus husi relatóriu ezekusaun diploma nian, husi parte Ministra Solidariedade Sosiál no Inkluzaun nian ne’e.

#𝐕𝐀𝐋𝐎𝐑𝐀𝐑 #𝐕𝐀𝐋𝐎𝐑𝐈𝐙𝐀𝐑

🄼í🄳🄸🄰🄶🅅🄿🄼🄼🄿🄾

– 𝙍𝙀𝙈𝘼𝙏𝘼